O interior de Galicia amence con temperaturas mínimas por baixo dos -5 ºC
O concello de Verín rexistrou a temperatura máis baixa de Galicia con -5,6 graos
Varios concellos das provincias de Ourense e Lugo acadaron os valores máis baixos a pasada noite
O interior de Galicia amenceu este sábado con temperaturas mínimas por baixo dos cinco graos negativos, como os -5,6 ºC rexistrados na localidade ourensá de Verín ou os -5,3 ºC e -5,1 ºC notificados nas estacións que Meteogalicia ten nos municipios lucenses de Sarria e Portomarín.
Así, as provincias de Ourense e Lugo foron as que máis sufriron unha noite de temperaturas xélidas, alcanzando tamén os cinco graos negativos en Viana do Bolo e os -4,8ºC en Xinzo de Limia.
Para este sábado, Meteogalicia explica que a comunidade quedará baixo a influencia dun potente anticiclón situado ao norte das Illas Británicas. Por iso, espérase unha xornada de ceos pouco nubrados en xeral, con máis nubes canto máis ao leste.
Rexístranse xeadas xeneralizadas no interior, pero as máximas irán en ascenso ao longo da xornada. En canto ao vento, soprará frouxo de compoñente leste, con algún intervalo moderado no litoral norte.
