Domingo de calor con alerta laranxa no interior da provincia de Pontevedra
As temperaturas poderían superar os 36 graos pola tarde
Un termómetro na Caniza marca 29 graos. EUROPA PRESS/Adrián Irago
A Xunta activa para este domingo a alerta laranxa por calor no interior da provincia de Pontevedra. Segundo as previsións de Meteogalicia, a chegada dunha masa de aire cálida deixará temperaturas que poderían superar os 36 graos pola tarde.
Os concellos afectados son Agolada, O Campo Lameiro, A Caniza, Cerdedo Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
No que se refire á práctica deportiva, o executivo galego recomenda adaptar os horarios das actividades ás condicións específicas de cada zona, tomando as medidas necesarias de protección.
Unha muller colle auga nunha fonte da Caniza. EUROPA PRESS/Adrián Irago
Recomendacións
Os principais grupos de risco son as persoas maiores de 65 anos, as menores de catro anos e as que padecen enfermidades cardiovasculares, pulmonares, diabetes, insuficiencia renal, párkinson, alzhéimer ou doenzas psiquiátricas.
A Consellería de Sanidade aconsella beber máis líquidos sen agardar a ter sede; evitar as bebidas quentes, as azucaradas, o alcol, o café ou o té; aumentar o consumo de ensaladas, verduras e froitas; evitar comidas copiosas; manter os alimentos no frigorífico e vixiar as medidas hixiénicas.
Así mesmo, recomenda usar roupa de tecidos naturais, de cores claras, chapeu, lentes de sol e cremas protectoras solares; permanecer en espazos ventilados ou estar á sombra; evitar as actividades ao aire libre nas horas de máis calor e reducir a actividade física.
