Publicador de contidos

Publicador de contidos

O incendio de Avila é o máis preocupante fóra de Galicia

O incendio de Avila é o máis preocupante fóra de Galicia

As lapas están próximas a unha aldea de Ávila con 350 habitantes

España é o país europeo máis afectado polos incendios forestais no que vai de ano

Polo momento non foi necesario evacuar os veciños de Santa Cruz del Valle
G24.gal 06/08/2022 20:30 Última actualización 06/08/2022 21:04

Ata vinte e seis avións e helicópteros, xunto con máis de catrocentos especialistas, traballan este sábado na extinción do incendio que arrasa hectáreas de monte de difícil acceso no sur de Ávila. 
A Xunta de Castela e León é pesimista sobre a evolución deste incendio, xa que as altas temperaturas e os ventos previstos favorecen o avance das lapas. O lume, claramente intencionado segundo as autoridades autonómicas e locais, está próximo á localidade de Santa Cruz del Valle, cuns 350 veciños, que polo momento non foron evacuados.

O incendio de Jódar, en Xaén, está estabilizado

A situación é máis positiva noutro dos grandes incendios forestais deste sábado, o que queimou arredor de seiscentas cincuenta hectáreas de monte nos arredores de Jódar, na provincia de Xaén, sen afectar zonas habitadas. Os responsables antiincendios andaluces consideran este lume estabilizado, e din que a orixe do mesmo foi un raio.

No que vai de ano, o lume arrasou en España 230.000 hectáreas

Outros incendios forestais de menor importancia afectan esta fin de semana a montes de Madrid e Cataluña. 
Segundo o Sistema Europeo de Información de Incendios Forestais, España é o país europeo con máis territorio queimado no que vai de ano, con case 230.000 hectáreas arrasadas.

Publicidade
Publicidade
Publicidade
Publicidade
Pódeche interesar