Chaman "mono" e "negro de merda" a un xogador do club de balonmán da Caniza nun partido nas Canarias

Mateus de Almeida, xogador de balonmán do club da Caniza, escoitou "mono" e "negro de merda", entre outros insultos, dende a bancada no partido que xogaron esta fin de semana en Canarias fronte ao Gáldar.

Insultos que obrigaron o equipo arbitral a desaloxar o público nos últimos minutos do encontro, xogándose a porta pechada. 

Antes, o propio xogador decidía abandonar a cancha.

"Díxenlle ao adestrador que non podía seguir xogando e o arbitro díxome que estivese tranquilo porque el tamén acababa de escoitar eses insultos", asegurou o xogador.

Mateus, de 23 anos e nacido en Angola, conta que lle sentou moi mal escoitar que un afeccionado do público lle chamaba "mono" e "comezaba a facer xestos coa cabeza, como se fose un animal".

"É duro velo así, ao final é un mozo que ven doutro país e aquí non ten familia, a única familia que ten somos nós, e iso é o que máis me afecta", manifestou Domingo Borja, o adestrador do Caniza Saeplast. 

O equipo arbitral parou o partido e eses últimos sete minutos xogáronse a porta pechada tras desaloxar todo o público da bancada.

"Desaloxouse a persoa implicada no feito, que non quería marchar, e tiveron que desaloxar o pavillón por completo", engadiu Domingo Borja.

O acontecido, recollido na acta arbitral, podería ter graves consecuencias para o equipo local que negou estes feitos. Este mércores o comité de competición decidirá a posible sanción se se confirma o sucedido.

"A min dáme igual que nos dean os dous puntos ou non. Eu non vou polos puntos, eu vou polo respecto ás persoas negras, para que non volva pasar", afirmou Mateus.

O club da Paradanta xa emitiu un comunicado denunciando estes feitos e tamén os estragos que sufriu un dos vehículos alugados polo club ao final do encontro. Tamén aproveita para amosar todo o seu apoio e da afección ao seu xogador.