Os robots humanoides chegarán ás nosas casas en menos dunha década

Rosalía e Viriato son os nomes que escolleu o CTAG para dous dos seus humanoides porque inclúen  IA, a intelixencia artificial no seu ADN. Malia estaren feitos na China, é no Porriño onde se adestran para que poidan traballar.

Ángel Dacal Nieto, responsable de innovación e impacto en 'manufacturing' do CTAG, explica. "Conteñen sensórica, motores e baterías e sobre todo moita intelixencia artificial. Nós o que facemos é adestralos para que fagan esas tarefas que queremos automatizar". 

Os primeiros están pensados para traballar en fábricas, por ser ámbitos máis controlados. Por exemplo, poden: "Manexar cargas, paletizar, baleirar unha caixa, mover cargas..." , explica Dacal.

O Centro Tecnolóxico da Automoción de Galicia posiciónase á cabeza da robótica avanzada. Máis alá das fábricas, en pouco tempo estes humanoides poderían traballar no agro o nos coidados das persoas.

"Poderán dar axuda nas residencias da terceira idade, en saúde e por suposto cremos que teremos un destes na nosa casa en 5 ou 10 anos", relata o responsable do laboratorio.

Aquí ábrense moitas oportunidades e desafíos que van máis alá da parte técnica e do desenvolvemento tecnolóxico.