Aprender a camiñar de novo cun robot rehabilitador

As alteracións da marcha son frecuentes tras sufrir un accidente cerebrovascular ou un traumatismo cranioencefálico. Tras sufrir un ictus ou un traumatrismo cranioencefálico, en ocasións é preciso volver a aprender a camiñar de novo. 

Aí entra en xogo o labor dos fisioterapeutas que nas distintas áreas de saúde están estreando un novo colaborador. Un robot rehabilitador que axuda o paciente a facer movementos máis precisos e, polo tanto, a axilizar a recuperación. O Sergas acaba de dotar con un a todas as áreas sanitarias.

"É un aparato moi complexo, que non substitúe a fisioterapia convencional, pero si que é un complemento, e cremos que  un complemento moi positivo", comenta Amparo Portero, xefa do servizo de Rehabilitación do HULA. 

Unha vez colocado o paciente na máquina, hai que adaptar os parámetros do robot ás necesidades concretas. Conta cun sistema de realidade virtual que mostra ao paciente un camiño a percorrer para facer máis atractivo o exercicio e para que el mesmo comprobe  os progresos.  

"Podes medir dunha forma moito máis obxectiva a evolución do paciente. Programas uns parámetros e a máquina tamén vai dicindo que velocidade ou marcha vai facendo. E o paciente ten unha retroalimentación positiva  porque el vai vendo o que vai mellorando". 

Non todos os pacientes neurolóxicos son aptos para o seu uso, é preciso que o usuario teña algo de mobilidade e forza nas extremidades.