O I+D galego, tras o éxito culinario da salicornia
Xa hai máis de 15 anos que os botánicos da UDC e de Porto-Muíños comezaron as primeiras investigacións na marisma de Betanzos
A verdura de costa de última moda, a salicornia, que empregan nos seus pratos algúns dos mellores chefs do mundo, cultívase en Galicia. Xa hai máis de 15 anos que comezaron as primeiras investigacións. Esta planta das marismas, tamén coñecida como espárrago de mar, ten propiedades medicinais, pero ademais de ser un superalimento, pode servir para depurar a auga da acuicultura.
Na marisma de Betanzos, tivemos a fortuna de atopar en pleno outono os últimos exemplares de salicornia da tempada, porque en cultivos a salicornia finaliza en agosto, cóntanos Manuela Buján, do departamento de I+D da empresa de Porto-Muíños. Xa en 2008, eles foron os primeiros da península ibérica en investigar as propiedades culinarias desta verdura de mar.
"Comezamos o proxecto en colaboración cos botánicos da UDC, facendo prospeccións nas zonas de marisma, recollendo as plantas, mandándoas a probar ao restaurante", explica Manuela Buján, do Departamento de I+D de Porto-Muíños
Primeiro ao Mugaritz, en Euskadi. Despois Can Roca ou o galego Olleros, no Culler de Pau, valoraron tamén na salicornia características como a textura untuosa, acuosa e un sabor salgado pero con pouco sodio. O espárrago de mar entrou nas tapas, os cócteis e na investigación clínica. Vitaminas e minerais fala idónea segundo din, para prevención da saúde cerebro vascular.
No seu éxito, agora global, xogou un papel determinante o traballo do grupo BIOCOST, neste laboratorio do CICA, da Universidade da Coruña, onde investigan os segredos da reprodución e o cultivo de algas e as plantas das zonas salinas. Agora, centrados na súa produción asociadas á acuicultura.
"O que facemos aquí é poñer esas plantas -como a salicornia- a vivir en auga que procede do cultivo doutros organismos mariños, moluscos ou peixes. Entón a planta medra, incorpora máis nutrientes e ao tempo está depurando e limpando a auga, retirando CO2, nitróxeno etc", di Javier Cremades, catedrático de Botánica da UDC e investigador do CICA
Da costa atlántica, á moda culinaria, o éxito de salicornia ten tras si 30 anos de I+D, iniciado en Galicia.
.png)
