O gusto polo panettone que volve ás mesas galegas polo Nadal
Máis de 30 horas de elaboración para un doce que cada vez gaña máis adeptos
No obradoiro do mestre pasteleiro Pablo Morales a actividade é frenética. Do forno están a saír os seus panettone.
"Polo peso e pola cantidade de manteiga e a humidade que ten ao ser tan tenro se non o penduramos boca abaixo encolleríase para baixo", explica o chef executivo e cofundador do obradoiro de pastelería artesanal Habaziro da Coruña.
Previamente xa leva feito un longo proceso de 30 horas en tres fases que implica o boleado e amasado.
Entre as variedades: de froitas, chocolate, de pistacho ou caramelo.
Non falta a innovación que comparte co chef do restaurante Pracer a través do grupo Coruña Cociña.
"Por terceiro ano facemos un panettone fusión onde el aplica sabores e técnicas do seu restaurante Pracer como a brasa, o cacahuete e o caramelo, e eu innovo na masa do panettone".
Á hora de consumilo aconsella ter en conta: "Sempre cortalo cun coitelo de serra para que o panettone non rompa a estrutura. Ten que ter a miga húmida.
A masa do panettone ten que estar atemperada para que teña a súa textura e todos os seus aromas. Por iso é importante mantelo nun lugar cálido a 22, 23 ou24 graos".
E xa está listo para ser degustado. Só ou acompañado cun café ou calquera outra bebida. A proposta deste mestre pasteleiro é facelo con viño ou champaña.
