O Goberno separa a suba das pensións do escudo social, con cambios nos desfiuzamentos a vulnerables

O Goberno volveu levar este martes ao Consello de Ministros a suba das pensións e o escudo social, que foran no decreto ómnibus tumbado no Congreso dos Deputados, e finalmente aprobou as dúas medidas en dous decretos por separado.

Por un lado foron as subas das pensións, cun incremento do 2,7 % con carácter xeral, e que segundo a ministra de Seguridade Social e voceira do Goberno, Elma Saiz, suporá uns 50 euros de media, "que é o que se puxo en perigo para máis de 9,4 millóns de españois".

Esa revalorización chega ao 7 % no caso das pensións mínimas e do 11,4 % para as pensións non contributivas e o ingreso mínimo vital.

A gran novidade, ademais de aprobar por separado os dous decretos, chega coa modificación do escudo social no que ten que ver nos desafiuzamentos de persoas vulnerables.

Segundo explicou Saiz, a medida non se aplicará cando os propietarios (arrendadores) sexan propietarios de tan só unha ou de dúas vivendas (unha na que viven e outra que alugan). Neses casos, deberán ser as administracións, a través dos servizos sociais, os que teñan que buscar unha alternativa habitacional para as familias afectadas. 

Segundo fontes do Ministerio de Vivenda, o novo decreto tamén reforza as compensacións para as persoas propietarias, como pedían o PNV e Junts.

Deste xeito o Goberno agarda poder achegar posicións co nacionalismo catalán da dereita que lle permita salvar o veto do Congreso, como ocorreu o pasado 29 de xaneiro.

Este novo decreto de escudo social inclúe tamén outras medidas como a moratoria do corte de subministracións a familias vulnerables ou o bono social eléctrico, pero tamén outras fóra dese paraugas benéfico, como son as entregas a conta a comunidades autónomas e a administracións locais ou axudas pola dina e os incendios.

Junts non aclara o seu voto, pero celebra que forzou ao Goberno a rectificar

A voceira de Junts no Congreso, Míriam Nogueras, celebrou que a súa formación "forzase" ao Goberno a "rectificar" e aprobar un decreto coa subida das pensións e outro co chamado escudo social, sobre o que, dixo, aínda teñen que "ler a letra pequena".

Nogueras festexou que a revalorización das pensións estea xa "garantida" e sacou peito do papel da súa formación. Con todo, a portavoz deixou claro que aínda teñen que "ler a letra pequena" dese decreto, e reprochou ao Goberno que leven seis anos "para atopar unha solución" e non facer " os deberes". 

Feijóo cre que o novo decreto demostra que o Goberno utilizaba os pensionistas

Pola súa parte o líder do PP, Alberto Núñez Feijóo, asegurou que a decisión do Goberno de partir o decreto ómnibus e aprobar por separado a revalorización das pensións demostra que o Executivo "estaba a utilizar aos pensionistas para liquidar os seus problemas políticos".

Feijóo dixo que aínda non coñece o contido de ambos os decretos, pero lembrou que o seu partido "estivo, está e estará" a favor da revalorización automática das pensións con arranxo ao IPC, pero que nunca aceptará chantaxes nin que se utilice aos pensionistas "como reféns".

Tamén se referiu ao decreto que prorroga ata o 31 de decembro deste ano a moratoria dos desafiuzamentos de familias vulnerables sen alternativa habitacional.

"É un país democrático un onde un dereito constitucional como é o dereito á propiedade queda anulado polo Goberno de Sánchez e os seus socios?", preguntouse.

Se unha familia ten dificultades para pagar, suxeriu, o que hai que facer é proporcionarlle unha vivenda social e non dicir os propietarios que non van cobrar a renda, abundou.