O Goberno descarta por agora bonificar o combustible ou rebaixar o IVE dos alimentos
As tres vicepresidentas e os ministros de Economía e Seguridade Social reuníronse este xoves cos axentes sociais para falar das medidas contra os efectos do conflito en Oriente Medio
Tras a reunión mantida cos axentes sociais, o ministro de Economía, Carlos Cuerpo, fixo un chamamento á "tranquilidade" xa que, na súa opinión, "estamos aínda lonxe da situación que se deu en 2022 coa guerra en Ucraína".
O Goberno cre polo momento a situación non é tan grave. Descarta por agora bonificar o litro combustible a todos os condutores como si fixo na anterior crise. Os descontos só se aplicarían aos sectores máis afectados como o agrario ou o transporte por estrada.
O executivo tamén descarta por agora unha baixada no IVE dos alimentos, e niso conta co apoio dos sindicatos. Para Pepe Álvarez, líder da UXT, "non se trata de quitar IVE sen máis". Unai Sordo, de CC. OO., recordou que as centrais sindicais non apoian "ningunha baixada de impostos xeralizada no noso país". Se as houbese, din os sindicatos, as rebaixas fiscais deberían aplicarse segundo o nivel de renda dos cidadáns.
O PP si reclama que o Goberno baixe impostos como o IRPF. Cre que o executivo vai tarde e lento. Miguel Tellado, secretario xeral do PP, cre que "con esa desidia, con esa calma chicha en que están instalados os ministros do Goberno de España, demostran que nin están nin se lles espera".
O Goberno aínda non ten data para presentar o seu plan coas medidas concretas.
