O Goberno arquiva o expediente contra a enerxética Holaluz e descarta inhabilitala
A empresa asegura estar ao corrente das súas obrigas e confirma que tanto as facturas en disputa como as posteriores se atopan"integramente saldadas
O Goberno pon en marcha a inhabilitación de Holaluz e o traspaso da súa clientela
Ricardo Rubio / Europa Press
O Ministerio para a Transición Ecolóxica e o Reto Demográfico acordou este venres arquivar os procedementos iniciados o pasado 16 de xullo contra Holaluz, polo que descarta a extinción da súa habilitación como comercializadora eléctrica e o eventual traspaso dos seus clientes.
A resolución do Ministerio, que deixa sen efecto as medidas provisionais adoptadas ao inicio do proceso, será publicada este sábado 29 de agosto no Boletín Oficial do Estado (BOE), segundo informou a propia compañía.
O procedemento sancionador orixinouse a raíz das reclamacións sobre a esixibilidade de varias facturas correspondentes a tres provedores por un importe conxunto de 4,39 millóns de euros, unha cantidade que contaba cun plan de pagamentos estipulado.
A enerxética explicou que integraba as devanditas facturas dentro do seu sistema de xestión controlada de tesourería e foi achegando ao Ministerio as evidencias dos pagamentos recorrentes efectuados.
A día de hoxe, Holaluz asegura estar "ao corrente das súas obrigas" e confirma que tanto as facturas en disputa como as posteriores se atopan "integramente saldadas".
Ao constatar esta situación, o ministerio resolveu que os feitos que motivaron a apertura do procedemento "non constitúen causa para extinguir a habilitación" da compañía nin forzar o traspaso dos seus clientes. Durante este mes e medio de procedemento, os clientes da firma mantiveron a súa subministración sen interrupcións.
Holaluz aproveitou o comunicado para subliñar que se atopa "saneada", malia o impacto na súa caixa de normativas como o Real Decreto de Resposta á Crise de Oriente Medio, unha medida que obrigaba a empresa a asumir o 21 % do IVE da enerxía que adquiría para despois repercutir só un 10 % ao consumidor, unha diferenza que espera solucionar nos próximos meses coa devolución da Axencia Tributaria.
A cofundadora e conselleira delegada da compañía, Carlota Pi, reaccionou á decisión sinalando que, malia ter só un 1 % do mercado, só se fala deles.
"Goliat seguirá atacando a David. A diferenza é que este David está armado con tecnoloxía, con miles de clientes que cren no mesmo modelo", afirmou a directiva, quen sentenciou que a comercializadora seguirá adiante a longo prazo, "moleste a quen moleste".
Holaluz é unha compañía enerxética e comercializadora de electricidade producida integramente con enerxía renovable.
As últimas contas divulgadas pola empresa son as de 2025, un exercicio que pechou cunhas perdas de 22,2 millóns de euros, un 29,5 % menos que en 2024, mentres que os seus ingresos caeron un 41 %, ao pasar dos 271 millóns en 2024 aos 158,9 millóns o ano pasado.
