Publicador de contidos

Publicador de contidos

O Goberno adía ata setembro o novo mapa de concesións de rutas do transporte público

O Goberno adía ata setembro o novo mapa de concesións de rutas do transporte público

O Ministerio de Transportes adiantaralles ás comunidades unha parte das subvencións ás tarxetas de abono

G24.gal 06/07/2022 14:58

A ministra de Transportes, Mobilidade e Axenda Urbana, Raquel Sánchez, busca abordar en setembro a petición de varias comunidades autónomas, entre elas Galicia, dun novo mapa concesional de servizos regulares de transporte por estrada, que reduce as rutas de 966 a 510.  

Así o trasladou a conselleira de Infraestruturas e Mobilidade, Ethel Vázquez, tras a Conferencia Nacional do Transporte, recalcando que o asunto do mapa de concesións é "estrutural" e chega nun momento en que os prezos dos carburantes "están disparados e seguen crecendo".  

Ante os medios de comunicación, Vázquez detallou que Galicia e outras autonomías trasladaron a súa "preocupación" polo novo mapa, que non poden "compartir". Segundo especificou, Sánchez sinalou que "toma nota" e que espera poder abordar o asunto coas comunidades autónomas interesadas en setembro.  

"Esperemos que así sexa", indicou a conselleira, que suxeriu unha conferencia presencial para abordar este asunto e o anteproxecto de lei de mobilidade sostible, ambos os "esenciais" para Galicia. "Son dúas normativas que para comunidades autónomas periféricas como Galicia son lesivas e diminúen de forma substancial os servizos de transporte".  

Galicia e outras autonomías buscaban tratar estes dous asuntos fóra da orde do día, centrado nas axudas á dixitalización ás pemes e empresas e ás axudas ao transporte mediante a bonificación do prezo do billete ao usuario. Con todo, segundo Vázquez, que insistiu en que ambos son "asuntos de calado" tamén para fomentar o transporte público, o Ministerio de Transportes "non tivo a ben" dialogar sobre as dúas medidas.

O Goberno avanza nas axudas para bonificar o transporte público ante a suba imparable do prezo do combustible. Adiantará un total de 100 millóns de euros ás comunidades autónomas para estes descontos.

Di a ministra, Raquel Sánchez, que terá que repartirse de xeito áxil para que poidan entrar en vigor en setembro.

Son uns fondos que as comunidades consideran insuficientes. Segundo os seus cálculos, tan só a Comunidade de Madrid precisaría 80 millóns de euros.

Por último, Ethel Vázquez informou de que non tivo "oportunidade" de tratar a derruba na A-6 e lembrou que o colapso "afecta seriamente a mobilidade de Galicia", xa que "é un eixe vertebrador esencial". 

Publicidade
Publicidade
Publicidade
Publicidade
Pódeche interesar

Publicador de contidos