O Fabril adiántase nas Gaunas pero non é capaz de aguantar a vantaxe (2-1)
O rioxano Martín Ochoa marcou de penalti pero os tantos de Santana e de Miguelete manteñen no máis alto á Unión Deportiva Logroñés
O Fabril foi capaz de adiantarse nas Gaunas pero non soubo manter a vantaxe e acabou perdendo diante do equipo que comparte o liderado co Lugo despois de sumar 16 dos 18 puntos posibles.
O equipo local entrou con moita forza no partido xerando ocasións nas botas de Marcos Baselga e Anai Morales. Pero foi o Fabril o que conseguiu adiantarse nunha xogada na que o colexiado asubiou penalti cometido sobre Álvaro Fraga. Era o minuto 29 e o Fabril non puido aguantar a vantaxe ao descanso logo do empate de Santana rematando unha xogada pola banda esquerda.
O segundo tempo resultou máis equilibrado. Ningún dos dous conseguía xerar perigo ata que no minuto 66 o adestrador local meteu no partido ao andaluz Miguelete. Avisou cun remate ao poste, despois aproveitou unha falta na frontal por suposta man de Teijo para anotar o segundo no 79 e puido ampliar a vantaxe no 82.
