O Frigoríficos quere asaltar o fortín do Cidade Real

O Frigoríficos do Morrazo encara sen confianzas a eliminatoria da Copa do Rei que este mércores enfróntao ao Caserío Cidade Real, líder en solitario da División de Honra Prata, no pavillón Quixote Arena, onde este curso só conseguiu gañar, e pola mínima, o BM Burgos.

O equipo dirixido por Santi Urdiales xa protagonizou a gran sorpresa a tempada pasada ao clasificarse para a fase final da competición, algo que ata a data non conseguira ningún equipo de División de Honra Prata por méritos deportivos. Unha fase final na que tamén estivo o Frigoríficos, que desde a chegada de Nacho Moyano ao seu banco converteuse nun asiduo da Final a 8 da Copa.

O reto deste curso, coa permanencia na liga Asobal encarrilada, é sacar o billete a fase final que se disputará en Irún. O cadro do equipo galego adestrarase este martes no Quixote Area de Ciudad Real, onde viaxou onte desde Aranda de Duero, onde o domingo perdeu ante o conxunto dirixido por Javier Márquez en Liga.

O próximo encontro ligueiro será contra o Barça no Gatañal, polo que Nacho Moyano non reservará a ningún xogador, á espera de como evolucionan os xogadores tocados. A Copa é unha competición que ilusiona no vestiario galego e na súa afección.