O Deportivo pode acadar o liderado provisorio por primeira vez na temporada

Unha vitoria do Deportivo fronte ao Badaxoz podería culminar a remonta dos herculinos cara ao liderado. Así afrontan o encontro os coruñeses, coa intención de reforzar o ánimo e refrendar o bo momento do equipo. Non sería decisivo a estas alturas da competición, pero si un importante estímulo.

Hai dez xornadas o Deportivo estaba a dez puntos da cabeza. Este sábado pode alcanzala provisoriamente por primeira vez. O hábitat é acaído: en Riazor conta por vitorias os últimos catro encontros. Non é hora de soltar o pé do acelerador diante do Badaxoz.

Algo semellante matina o Rácing. Reenganchado á zona de promoción, non quere afrouxar en Linares. Ao Celta B, que vai a Mérida, fáltalle un chanzo para entrar na batalla do ascenso, malia que as contas de Giráldez, que non estará por sanción, son outras.