O Deportivo homenaxeou a Marisa García e a Ainoa Gómez, campioas do mundo sub-20
As dúas recoñeceron que conseguir o título é “un soño cumprido”
A dianteira Marisa García, xogadora do Deportivo, afirmou este mércores que gañar o Mundial sub-20 coa selección española é “un soño cumprido” e, por iso, o seu novo reto agora pasa por alcanzar a internacionalidade coa absoluta.
En rolda de prensa, a atacante deportivista, de 20 anos, lembrou que a porteira norcoreana sacoulle “dous bos tiros” durante o partido, pero logo puido reivindicarse marcando un dos lanzamentos da quenda de penaltis (4-3).
“Tiña bastante claro onde íao a tirar; si que pensas bastante e intentas facelo o máis doado posible. Nese camiño ata chegar ao momento de penalti pásanseche moitas cousas pola cabeza, eu pensei moito na miña familia, en metelo e en estar tranquila. Tiña moita confianza e seguridade, en min e en todas as que iamos tirar, tamén en Laia”, declarou.
Pola súa banda, Ainoa Gómez, dixo que aínda están “a asimilar” o éxito que conseguiron tras derrotar na final disputada este domingo a Corea do Norte.
“Pasaron xa tres días, pero aínda o estamos asimilando todo. Gañar un Mundial é un soño. Estes partidos vívense moi poucas veces na vida, estamos moi felices de conseguilo”, declarou a futbolista catalá en rolda de prensa.
A exxogadora do Barça, que esta tempada xogará a préstamo no conxunto branquiazul, coincidiu coa súa compañeira Marisa García, a outra representante do Dépor no equipo nacional, en que o novo reto que teñen por diante é chegar á selección absoluta.
