O Dépor condena insultos a xogadores e xustifica a censura a xornalistas
O club asegura nun comunicado que os xogadores están recibindo presións e insultos por parte dos afeccionados
O conflito chega tamén á prensa, censurando preguntas sobre o malestar das bancadas
Protesta en Marathón inferior cos afeccionados vestindo de cor laranxa
O malestar entre afeccionados e o R. C. Deportivo vai a máis. No partido de onte, as camisolas laranxas eran maioría en Marathón inferior e tamén se deixaron ver no resto de bancadas. A acción, promovida pola Federación de Peñas e os Riazor Blues, pretendía chamar a atención do club para reverter as condicións particulares desta bancada e recuperar o bo ambiente en Riazor.
Despois do partido, o desencontro chegou tamén ás comparecencias, co departamento de prensa do club evitando que os xornalistas puidesen preguntar sobre esta cuestión a Ximo Navarro, que saíra a zona mixta. Hoxe, o club xustifica este novo paso como unha protección aos xogadores, que estarían recibindo insultos e presións "tanto de forma presencial como a través de mensaxes en redes sociais e aplicacións de mensaxería", escriben nun comunicado.
"O Club considera absolutamente inaceptable calquera comportamento desta natureza e condena de forma firme toda manifestación de violencia, intimidación ou ameaza dirixida contra os xogadores e contra calquera dos membros do RC Deportivo. (...) Estas actuacións tiveron como consecuencia a decisión adoptada nas comparecencias posteriores ao partido ante o Elche CF, nas que adestrador e xogadores se limitaron a responder a cuestións estritamente deportivas", xustifican desde o Deportivo.
Varias asociacións de periodistas, entre elas o Colexio Profesional de Xornalistas de Galicia, a Asociación de Prensa da Coruña e a Asociación Galega de Xornalistas do Deporte, condenaron esta situación e reclaman respecto para o traballo dos xornalistas.
