O condenado por golpear un home cunha pedra, detido por outra agresión e por pasear espido por Santiago

O presunto autor dunha brutal agresión o pasado domingo a unha persoa que paseaba o seu can á beira do río Sarela foi arrestado tras pasear case espido nas inmediacións da catedral de Santiago de Compostela, informou este venres a Policía Nacional.

O pasado martes uns cidadáns alertaron a policía da presenza dun individuo semiespido ensinando os seus xenitais aos viandantes mentres profería insultos nas rúas contiguas á catedral.

O home intentou agredir os policías que lle solicitaron reiteradamente a súa identificación e proferiu ameazas de morte aos intervenientes, polo que foi neutralizado e detido por atentado e resistencia a axentes da autoridade.

O home xa estaba baixo investigación como sospeitoso dunha agresión brutal o domingo a unha persoa nas proximidades do río Sarela, á que golpeou cunha pedra en diversas partes do corpo e a cabeza sen motivo aparente e aínda permanece ingresada nun hospital por lesións graves.

Finalmente, tras as declaracións de vítima e testemuñas e outras dilixencias, os investigadores puideron determinar que o detido era o presunto autor do devandito ataque.

O arrestado foi posto o pasado mércores ao dispor das autoridades dun xulgado de garda, que decretou o seu ingreso en prisión.