Aparecen pintadas no Mosteiro de Carboeiro, unha das xoias do románico galego
As marcas, de cor alaranxada, afectan á parte exterior da cripta
O concello de Silleda pídelle á Dirección Xeral de Patrimonio que avalíe o alcance dos danos e proceda á súa limpeza
Detalle das pintadas realizadas no Mosteiro de Carboeiro (Foto: concello de Silleda)
O Concello de Silleda informou á Dirección Xeral de Patrimonio da aparición de pintadas no Mosteiro de San Lourenzo de Carboeiro; un mosteiro fundado no século X, declarado Monumento Nacional en 1931 e considerado unha das xoias arquitectónicas de estilo románico máis destacadas de Galicia.
As marcas, realizadas con material brando e de cor alaranxada, foron descubertas a finais da semana pasada na parte exterior da cripta.
O Goberno local pídelle á Xunta que realice unha inspección técnica co fin de avaliar o alcance dos danos e determinar que protocolo a seguir para proceder á súa limpeza, conservación ou restauración para que se poidan eliminar sen comprometer a integridade do soporte pétreo nin a lexibilidade da inscrición. O concello adxunta na comunicación documentación fotográfica cos danos advertidos.
O consistorio pídelles á cidadanía e aos visitantes "extremar o respecto e o coidado" do patrimonio histórico, especialmente nun enclave "tan simbólico e singular" como o Mosteiro de Carboeiro.
