O Clúster do Turismo aposta por especializar os aeroportos galegos para captar rutas

O Clúster do Turismo de Galicia trasladoulle á Xunta e a todos os axentes implicados a proposta do sector para mellorar a conexión aérea da comunidade, con medidas como "a especialización dos aeroportos galegos para evitar duplicidades" ou a creación de "unha figura técnica especializada que actúe como interlocutor na captación de rutas".

O documento recolle as conclusións dunha mesa de expertos do sector turístico no que se expoñen ata oito liñas de actuación para "promover un uso complementario dos tres aeroportos, mellorar a súa accesibilidade e incrementar as frecuencias cara a mercados prioritarios", informan nun comunicado.

Esta semana, o presidente Cesáreo Pardal, e o tesoureiro da entidade, Alfonso Martínez, reuníronse co conselleiro de Presidencia, Xustiza e Deportes, Diego Calvo, para seguir abordando posibles liñas de colaboración neste ámbito.

Desde a Agrupación industrial propoñen avanzar cara á especialización dos aeroportos galegos para evitar duplicidades e mellorar a eficiencia global do sistema aeroportuario, orientando os aeroportos da Coruña e Vigo "cara ao segmento de viaxes profesionais e de negocios" e reforzando o aeroporto de Santiago no seu posicionamento "no ámbito turístico e vacacional".

Ademais, tamén piden a creación dunha figura técnica especializada que actúe como interlocutor profesional con capacidade de negociación directa con aeroliñas, destinos estratéxicos e operadores turísticos.

"Esta figura debería contar con autonomía e recursos suficientes para desenvolver un labor proactiva de captación de roteiros, permitindo unha interlocución máis profesionalizada e eficaz co mercado aéreo internacional", sinalan.

Entre as medidas tamén se recolle a disposición do sector turístico galego "a implicarse de forma directa nas accións de promoción e captación de novas conexións aéreas".