O aeroporto da Lavacolla comeza a operar con Nova York coincidindo coa súa reapertura

A terminal compostelá da Lavacolla recupera a normalidade despois de 35 días pechada por obras. E faino recibindo os primeiros pasaxeiros procedentes de Nova York, o enlace estrela desta nova etapa.

De agora en diante, será posible viaxar directamente aos Estados Unidos desde Santiago. A compañía United Airlines ofrece, ata o vindeiro 21 de setembro, tres frecuencias semanais, os luns, xoves e sábados, por arredor de mil euros.

Na mañá deste xoves, sobre as 07:40, aterraba o primeiro destes voos procedente de Nova York e contra as dez da mañá saía o avión de regreso.

Coincidindo coa súa reapertura despois de 35 días de obras, a terminal estrea unha nova oferta de rutas a novos destinos nacionais e outros doce internacionais. Así, desde este sábado haberá conexión directa con Amsterdam e desde o luns, 1 de xuño, coa cidade irlandesa de Cork.

Os primeiros viaxeiros que se achegaron á terminal non ocultaban a súa satisfacción pola recuperación da operativa.

O obxectivo é superar a marca dos tres millóns e medio de viaxeiros e tentar remontar a perda do 30 % de pasaxeiros do primeiro trimestre deste ano.