O cemiterio de Xerdiz, toda unha xoia indiana cun gran valor artístico

O cemiterio indiano de Xerdiz, en Ourol, constitúe toda unha xoia do patrimonio mariñao. Construído en 1908, fora sufragado coas doazóns duns 175 veciños da parroquia, 64 deles emigrados a Cuba. Todos figuran nunha placa colocada á entrada do camposanto.

"O meu avó, que foi a Cuba, tamén puxo aí unha pequena cantidade. E coma o meu, moitos máis veciños de por aquí que xa morreron. Cheguei a coñecer o meu avó, pero non outros que estaban en Cuba", conta Guillermo Castro, neto dun emigrante que sufragou a obra. 

Entre outros canteiros, no cemiterio traballou Francisco Veiga, coñecido como o Pena de Miñotos. Co seu labor, crearon esculturas, columnas e cruces de distintos tipos, que chaman a atención dos visitantes que se achegan ata o lugar para contemplar estas obras.

"Chámalles a atención porque os nichos son moi antigos, moitos con máis de cen anos. Eu cheguei a coñecer un canteiro moi famoso que fixo a maior parte deles, pero tamén houbo outro, que era da parte de Vilalba. O que coñecín era de aquí, de Ourol, da parroquia de Miñotos, e era moi bo albanel e canteiro", sinala Guillermo. 

Os veciños de Xerdiz, todos descendentes dos que custearan a obra, son hoxe en día os encargados de custodiar este ben cultural.