O Celta Fortuna leva a iniciativa, pero o Guadalaxara marcha cos puntos de Barreiro (0-1)
O filial gozou das mellores ocasións, pero un gol de Ablanque decidiu o partido no 88', cando o Guadalaxara xogaba con dez
O Celta Fortuna mereceu moito máis contra o Guadalaxara, pero marchou sen nada. Logo dunha primeira metade na que tivo as mellores ocasións, e dunha segunda cun penalti e un gol anulados, o conxunto alcarreño acabou gañando cando xogaba cun menos.
O Fortuna non acusou o cambio do seu escenario habitual, Balaídos, ás dimensións máis reducidas de Barreiro. Os de Fredi fixéronse donos do partido xa desde o inicio, cun Ángel Arcos moi incisivo desde o carril esquerdo. O canteirán protagonizou dúas ocasións case consecutivas, cunha conducción espectacular que rematou cruzado, e cun pase de Gavián que estrelou na defensa.
Despois tocoulle a Hugo González, que lanzou unha falta axustada ao pau, e despois buscou a escadra desde a frontal. Os dous tiros saíron por pouco.
O Guadalaxara so inquedou de xeito case involuntario, cun centro de Miguel Ángel Cera que se estrelou no pau de Coke.
Na segunda metade mantívose a tónica, aínda que o Fortuna non era quen de crear ocasións claras, e o Guadalaxara saía con perigo á contra. Nos últimos minutos houbo varias accións polémicas. Un penalti sobre Gavián revisouno o árbitro e acabou cambiando a súa decisión. Logo, Luis Bilbao marcaba desde dentro da área, pero o colexiado indicaba falta previa de Burcio e anulaba o tanto. Despois expulsaba a Cañizo por unha forte entrada na área viguesa.
E, cando os alcarreños xogaban con dez, foron quen de marcar e levar a vitoria. Foi nun córner ao que seguiu un barullo na área, centraba Eulate e marcaba Ablanque. Aínda acadaron un segundo gol os visitantes, pero foi anulado por posición de fóra de xogo. Primeira derrota do Fortuna na Liga, no seu primeiro encontro como local.
