Bajcetic entra por vez primeira nunha convocatoria do Celta Fortuna
Fredi confirma que terá minutos ante o Xirona
Germain Milla e Ángel Arcos viaxan dende Glasgow
Stefan Bajcetic é a gran novidade da convocatoria do Celta Fortuna para xogar mañá en Xirona. É a primeira vez que esta tempada aparece na lista do filial celeste. Castigado polas lesións -non xoga dende maio de 2025, cando militaba nas Palmas-, o centrocampista vigués ten por fin a oportunidade de debutar co Celta Fortuna.
"A idea é que empece a ter minutos. Ten que ser unha adaptación moderada ao ritmo de competición. Que xogue dez ou quince minutos. E logo que vaia crecendo na minutaxe", explicou o adestrador, Fredi Álvarez.
Tamén estarán co Celta Fortuna, Germain Milla e Ángel Arcos, que viaxarán dende Glasgow cara a Xirona para incorporarse á expedición.
O conxunto galego examínase en Montilivi ante un dos candidatos ao ascenso. O Xirona, con ex xogadores do Celta como Beltrán e Carles Pérez, suma cinco xornadas sen perder e vai quinto clasificado.
"Somos conscientes da dificultade. É un equipo que mantivo moitísimos xogadores da tempada pasada, hai dúas campañas estaba en Champions, candidato ao ascenso directo... Pero é un dos partidos máis apetecibles. Non temos medo", afirmou Fredi.
