O Pontevedra derrota ao Cacereño cun gol de penalti de Yelko (1-0)
Os granates pasaron por problemas na segunda metade, pero aseguraron o importante triunfo
O Cacereño quedou con nove xogadores no tempo engadido
O Pontevedra resolveu o partido nos primeiros minutos en Pasarón.
Foi un bo comezo do equipo de Rubén Domínguez e ademais gozou da oportunidade que lles concedeu Toño Calvo. O defensor do Cacereño cometeu un claro penalti por agarrón a Yelko Pino na área. Era o minuto 7. Pediu revisión o cadro estremeño para que se ratificase o colexiado, e de seguido o capitán granate marcou o que sería o único gol do partido.
A primeira metade rematou coa vantaxe mínima dun Pontevedra que sabía da importancia dos puntos. O Cacereño botouse arriba na segunda metade, e gozou dun par de ocasións claras para empatar que non foi quen de aproveitar.
Pola parte granate puido chegar a sentenza por medio de Mba, pero o dianteiro non atinou a marcar.
No tempo engadido o Cacereño recibiu dous cartóns vermellos, e rematou con nove tras as expulsións de Artola e Iván Martínez.
Importante triunfo para o Pontevedra, o terceiro da Liga, que lle permite volverse situar na zona cómoda da táboa.
