O candidato europeísta Nicusor Dan gaña as eleccións presidenciais en Romanía
Nicusor Dan sumou o 55 % dos votos emitidos dentro do país, cun escrutinio do 99,85 %
Nicusor Dan, o gañador das eleccións en Romanía, celebrando o resultados. Imaxe/ Reuters
O candidato europeísta Nicusor Dan gañou este domingo as eleccións presidenciais en Romanía ao sumar un 55% dos votos emitidos dentro do país, cun escrutinio do 99,85 % e sen posibilidade matemática para o seu rival, o ultranacionalista George Simion, de reverter o resultado co escrutinio restante do voto no exterior.
O matemático tranquilo que derrotou a ultradereita
O independente Nicusor Dan, alcalde de Bucarest e matemático de formación, gañou este domingo a controvertida repetición das eleccións presidenciais de Romanía tras vencer nunha axustada segunda volta o ultranacionalista George Simion.
A súa vitoria supón, segundo os analistas locais, un respaldo ao proxecto europeo do país balcánico, unha aposta pola estabilidade institucional e o rexeitamento ao populismo nacionalista que encarna Simion.
Dan ten agora a responsabilidade de restaurar a confianza nas institucións e encarar unha difícil situación económica marcada polo déficit máis alto da Unión Europea (UE) e a ameaza dunha rebaixa na cualificación crediticia do país.
Con 55 anos, Dan é un político independente, ideoloxicamente máis conservador que progresista, e coñecido pola súa traxectoria académica e o seu activismo cidadán.
A pesar do seu carácter reservado e o seu escaso carisma, Dan logrou conectar cun electorado urbano, novo e canso da corrupción que viu nel a un político honesto capaz de modernizar o país.
Vive de forma modesta, sen propiedades nin coches caros e con débedas bancarias, algo inusual na política romanesa e que reforzou a súa credibilidade ante os votantes.
Nacido en Fagaraș, no corazón de Romanía, destacou desde mozo nas matemáticas e logrou medallas en olimpíadas internacionais. Máis tarde doutorouse na prestixiosa Escola Normal Superior de París.
Tras regresar ao seu país a finais dos anos 1990, traballou no Instituto de Matemáticas da Academia Romanesa, combinando ese labor coa defensa do patrimonio urbanístico e cultural de Bucarest.
O seu activismo levouno a crear en 2008 unha asociación que impulsou numerosas demandas contra irregularidades urbanísticas e abusos inmobiliarios.
En 2015 fundou a Unión Salvar Bucarest, que rapidamente se converteu na Unión Salvar Romanía (USR), que en 2016 logrou entrar no Parlamento como terceira forza política do país.
Con todo, en 2017 decidiu abandonar a formación tras un debate interno sobre a definición constitucional do matrimonio exclusivamente como a unión entre home e muller, algo ao que se opuxo USR.
Dan mostrouse a favor do dereito ao aborto nun país moi conservador no social e no que a Igrexa ortodoxa ten moita influencia.
En 2020 foi elixido alcalde de Bucarest con apoio tanto de USR como do conservador Partido Nacional Liberal (PNL) e en 2024 renovou o seu mandato con case o 50% dos votos xa como candidato independente.
Como alcalde foi criticado polos seus problemas para comunicar, aínda que mantén o respaldo cidadán grazas á súa firme oposición ao abuso das grandes promotoras e ao seu compromiso coa transparencia e o desenvolvemento urbano sostible.
Durante a campaña presidencial, Dan foi obxecto de varias campañas para manchar a súa imaxe, con documentos falsificados, vídeos manipulados e rumores infundados sobre a súa vida privada, como que non bautizara os seus dous fillos.
Dan vive coa súa parella, Mirabela Gradinaru, desde hai máis de dúas décadas, pero non están casados, algo tamén criticado polos sectores máis conservadores do país.
O seu programa presidencial, denominado "Unha Romanía honesta", propón profundas reformas institucionais, entre elas a dixitalización do Estado, a redución da burocracia, o fomento da meritocracia nos cargos públicos e a modernización do sistema xudicial.
En política exterior, Dan defende un aumento do gasto en defensa ata o 3,5% do PIB, o fortalecemento da alianza cos Estados Unidos e a redución da dependencia tecnolóxica respecto a potencias autoritarias como a China.
A elección de Dan foi vista como un triunfo do europeísmo moderado fronte ao discurso nacionalista e euroescéptico de Simion, líder da formación ultradereitista AUR, coñecido polas súas posicións radicais e pola súa proximidade a figuras como Donald Trump. EFE
.
