Sánchez confirma que se presentará ás eleccións xerais de 2027

O presidente do Goberno, Pedro Sánchez, confirmou este mércores a súa intención de repetir como candidato do PSOE nas eleccións xerais de 2027, desbotando calquera hipótese de adianto electoral.

“Estou decidido a presentarme ás eleccións xerais en 2027”, declarou durante unha rolda de prensa ofrecida en A Haia, tras o cumio da OTAN.

Na súa intervención, Sánchez respondeu a preguntas sobre a situación política nacional e, en particular, sobre o caso Koldo, que provocou recentemente a dimisión do secretario de Organización do PSOE, Santos Cerdán. Reiterou que o seu é “un goberno limpo” e defendeu a xestión dos últimos sete anos, nos que tivo que gobernar “en circunstancias extraordinariamente adversas” e con minoría parlamentaria.

O presidente expresou a súa “vergoña” polos casos de corrupción como os que está a investigar a Unidade Central Operativa (UCO) da Garda Civil, e destacou que o PSOE actuou con firmeza e colaboración coa xustiza.

Críticas ao PP e comparación co caso Gürtel

Sánchez aproveitou para criticar o comportamento doutros partidos ante casos similares. Asegurou que, mentres a UCO puido acceder sen problemas á sede do PSOE para obter datos de Santos Cerdán, no caso Gürtel os investigadores atoparon “ordenadores destruídos a marteladas” na sede do PP en Xénova, en referencia ao equipo que utilizaba o extesoureiro Luis Bárcenas.

“Fomos implacables, respondemos, e oxalá outros partidos políticos, ante casos con sentenzas ou con indicios aínda máis firmes, fixesen o mesmo”, concluíu Sánchez.