PP, Vox e Junts tomban a tramitación da redución da xornada laboral
Yolanda Díaz di que a medida está gañada na rúa e que a volverá levar ao Congreso
O Congreso dos Deputados rexeitou que o proxecto de lei para reducir a xornada laboral a 37,5 horas semanais siga a súa tramitación parlamentaria ao prosperar as emendas á totalidade cos votos de PP, Vox, Junts e UPN.
Foi a primeira derrota para o Goberno do novo curso político. Tal e como anunciaran, PP, Vox e Junts votaron en contra da redución da xornada laboral no Congreso, o que frea a tramitación do proxecto de lei.
Os cataláns din que é prexudicial para o seu tecido empresarial, e que responde a un interese persoal de Yolanda Díaz.
"Este é o seu proxecto persoal, o da súa supervivencia política, apoiada polos sindicatos españois", dixo Josep María Cervera, de Junts.
Para Vox é unha medida trampa.
"Que brincadeira é esta?, quere convencernos de que hai que traballar menos nun país onde non hai emprego. O señor Sánchez quere mandala ao matadeiro", di o deputado José María Figaredo.
O PP criticou que a redución da xornada chegara ao Congreso politizada, din, sen consenso e sen medir as consecuencias.
"Non é votar si ou non. É decidir se o queremos facer con consenso ou coa súa imposición, con traballo ou con ideoloxía, con responsabilidade ou con propaganda. Se o facemos nos termos que nos propón será unha medida que traerá máis precariedade e soldos máis baixos", di Juan Bravo, deputado popular.
Na quenda de réplica, Yolanda Díaz acusou a Junts, PP e Vox de darlle as costas á clase traballadora.
"Esto vai de redistribuír a riqueza. E xa é hora de que as grandes empresas cedan un pouco, media hora ao día. Vostedes pensan que votando en contra danlle un pau ao Goberno, ou a min. Pero a labazada non é para nós, é para 12,5 millóns de traballadores e traballadoras".
Díaz di que o debate está gañado na rúa e que volverá levar a redución da xornada laboral ao Congreso.
