O bo tempo e as reservas de última hora fan que a Ribeira Sacra roce o cheo
A ocupación para os días fortes de Semana Santa roldaba o 80%, pero agárdase que se enchan case todas a prazas
As viaxes en catamarán e as rutas para coñecer o románico, entre as actividades máis demandadas
Agardan no embarcadoiro de Santo Estevo para coller a primeiro barco polo canón do Sil. O número de viaxes incrementouse durante esta Semana Santa.
O bo tempo convida a coñecer a Ribeira Sacra dende a auga. Só nos catamaráns que xestiona a Deputación de Lugo o número de reservas supera o milleiro.
Visitantes chegados, sobre todo, do norte da península que acoden atraídos pola paisaxe, o viño, a tranquilidade e o patrimonio. Hai aloxamentos que xa penduraron o cartel de completo dende esta fin de semana como as cabanas do Mirador de Cachamuiña ou moitos hoteis de tres e catro estrelas.
O resto confían en que as reservas de última hora, impulsadas polo bo tempo, acaben enchendo todas as prazas que hai na zona, máis de 10.000.
