O Belén de Begonte inaugurou este sábado a súa 55 edición
Esta nova edición está marcada pola lembranza de quen deixou nel unha pegada imborrable
Entre as novas incorporacións destaca unha figura dedicada a Jesús Domínguez Guizán, o párroco que impulsou o belén durante case catro décadas e que faleceu recentemente
A outra novidade tamén mira ao pasado: unha figura que representa o traballo dos antigos canteiros artesanais
Fora declarado Festa de Interese Turístico e visítano cada ano unhas 40.000 persoas
É unha das citas do Nadal máis recoñecidas en Galicia, un mundo en miniatura con máis dun cento de figuras que cobran vida.
Como cada ano, desde 1972, as escenas sucédense e os oficios tradicionais reviven. Nestas cinco décadas o Belén de Begonte non deixou de medrar.
A inauguración oficial contou co pregón de Xosé Manuel Merelles, director da Axencia de Turismo de Galicia e coa música das Escolas Mancomunadas de Rábade, Begonte, Outeiro de Rei e Friol.
"Reflicten a Galicia tradicional, rural dos anos 60, aos que vivimos aquel tempo nos chega ao corazón e aos máis novos é como un parque temático, no que che están exlicando a túa historia social", destaca Xulio Xiz, xornalista xubilado e amigo do Belén de Begonte.
Esta nova edición do seu tradicional belén mecánico está marcada polas novidades e pola lembranza de quen deixou nel unha pegada imborrable.
Cada edición trae novidades. E a deste ano ten tamén un importante compoñente emocional.
Entre as novas incorporacións destaca unha figura dedicada a Jesús Domínguez Guizán, o párroco que impulsou o belén durante case catro décadas e que faleceu recentemente. Unha homenaxe para quen tanto contribuíu a manter viva esta iniciativa.
"A mellor homenaxe que podemos facerlle é tratar que isto continúe", di José Ulla, alcalde de Begonte.
"Lémbrame todo isto a don Jesús". "Cúrrano moito cada ano máis", din algún dos veciños que non faltan á visita.
"O resto das figuras son figuras vellas, tivemos que modificalas case todas poruqe teñen moitos anos", engade Carlos Torres, encargado do mantemento do Belén de Begonte.
A outra novidade tamén mira ao pasado: unha figura que representa o traballo dos antigos canteiros artesanais, aqueles que transformaban a pedra coas súas mans. Dúas creacións de Ramiro Cruz Gómez, un dos coidadores do belén.
Poderase visitar durante dous meses... cada ano unhas 40.000 persoas regresan para descubrilo.