O BBVA mantén a súa opa sobre o Sabadell malia as condicións do Goberno

O BBVA anunciou este luns que continúa coa súa oferta pública de adquisición (opa) sobre o Banco Sabadell, a pesar das condicións impostas polo Goberno, que impiden a fusión das dúas entidades durante polo menos tres anos no caso de que a operación prospere.

O grupo que preside Carlos Torres comunicou á Comisión Nacional do Mercado de Valores (CNMV) que non renuncia á operación e que segue adiante co obxectivo de que os accionistas do Sabadell poidan decidir canto antes sobre o seu futuro.

O último Consello de Ministros autorizou a opa, pero estableceu como condición que, se sae adiante, BBVA e Sabadell se manteñan como entidades independentes, incluída a súa xestión, durante un período mínimo de tres anos, que podería ampliarse ata cinco. Esta esixencia dificulta os aforros previstos pola operación.