O Baxi volve a Galicia tras levar con orgullo o nome de Ferrol por Europa
O equipo chegou a Narón ás seis da tarde onde foi aclamado por moitos afeccionados
Na súa primeira participación continental o equipo ferrolán foi a revelación da Eurocup meténdose na final e ofrecendo un gran espectáculo de xogo e ambiente nos seus partidos
O Baxi xa está en Galicia. O equipo chegou a Narón ás seis da tarde onde foi aclamado por moitos afeccionados.
Para sempre quedará esta participación do Baxi Ferrol na Eurocup na memoria dos afeccionados galegos ao baloncesto. O modesto equipo ferrolán paseou por primeira vez nun torneo continental con fachenda o nome de Ferrol por toda Europa. Derrotou grandes clubs e chegou desde a fase previa ata a gran final na que perdeu contra o último subcampión da Champions de baloncesto feminino.
A palabra "orgullo" era a máis escoitada entre os adestradores e as xogadoras. Polo xeito de afrontar cada un dos partidos da competición e de competir nun terreo descoñecido. A afección festexou a carón dos seareiros franceses porque o Baxi tamén conseguiu o seu título nesta Eurocup, o de enganchar a unha cidade ao baloncesto.
