O Banco de España rebaixa tres décimas, ao 2,4 %, a previsión de crecemento para 2025

O Banco de España recortou tres décimas a súa previsión de crecemento para o produto interior bruto (PIB) español en 2025, ata o 2,4%, á vez que rebaixou nunha décima a súa estimación de 2026, ao 1,8%.

Así o avanzou o gobernador do Banco de España, José Luis Escrivá, durante a súa intervención no Congreso dos Deputados.

Aínda que está previsto que o organismo publique o informe completo sobre as proxeccións macroeconómicas este martes, Escrivá quixo adiantar as previsións para a economía española, que agora está marcada por unha incerteza elevada e unha contorna "extraordinariamente complexa".

A exposición comercial directa de España a Estados Unidos é limitada e menor que a doutras grandes economías da Unión Europea, aínda que a exposición indirecta é maior nalgúns sectores, como o químico, debido á integración da economía nas cadeas globais de valor.

O gobernador explicou que a economía española está a experimentar unha desaceleración do crecemento desde taxas superiores ao 3% a unha taxa próxima ao 2,5% no primeiro semestre de 2025.

O principal factor detrás da desaceleración é a menor contribución do sector exterior. Ademais, a incerteza é o principal factor que está a afectar ás empresas. Un 30% das empresas declara estar afectada polos aranceis e o 80% das afectadas aseguran que a incerteza é un factor relevante.

Mellora as proxeccións de inflación 

As novas previsións do Banco de España apuntan a unha taxa de inflación xeral media en 2025 do 2,4%, unha décima menos do proxectado en marzo.

Máis aló de 2025, espérase que o proceso desinflacionario continúe en 2026, momento en que a taxa de inflación xeral media descendería ata o 1,7%.