O BCE eleva tres décimas, ao 1,2 %, o crecemento previsto para a eurozona en 2025

O Banco Central Europeo (BCE) mellorou tres décimas, ata o 1,2 %, o crecemento previsto para a eurozona en 2025, en tanto que rebaixou unha décima, ao 1 %, o prognosticado para 2026.

Ademais, o BCE elevou unha décima, ao 2,1 %, a inflación media prevista para este exercicio, co que volve deixar para 2026 a consecución do obxectivo da inflación do 2 % que a entidade mantén como referencia para a toma das súas decisións de política monetaria.

Para 2026 a previsión de inflación xeral na eurozona elévase tamén unha décima, ao 1,7 %, en tanto que para 2027 baixa ao 1,9 %, unha décima menos.

O comunicado publicado este xoves polo BCE di que as novas proxeccións dos expertos presentan un panorama "moi similar" ao de xuño.

A inflación subxacente (sen enerxía nin alimentos) manterase no 2,4 % este ano e no 1,9 % o próximo, para baixar ao 1,8 % en 2027, unha décima menos do previsto en xuño. 

Tipos de xuro estabilizados no 2 %

O regulador monetario europeo acordou, ademais, manter o tipo de xuro dos depósitos dos bancos no 2 %, precisamente por esa previsión sobre a inflación, que prevé estable a medio prazo.

O BCE informou de que o Consello de Goberno deixa inalterado o prezo do diñeiro porque a inflación se sitúa actualmente ao redor do obxectivo do 2 % a medio prazo e a súa valoración sobre as perspectivas de inflación mantense practicamente sen cambios.

Lagarde di que a desinflación concluíu e o BCE "aínda está nun bo lugar"

A presidenta do BCE, Christine Lagarde, dixo este xoves na conferencia de prensa na que se presentaban estas novas proxeccións que "o proceso desinflacionario concluíu" e que a entidade está nun bo lugar, polo que deixa entrever que non vai baixar máis o tipos de xuro se a situación non cambia moito.

A decisión do Consello de Goberno do BCE de manter os tipos de xuro oos depósitos dos bancos no 2 % por unanimidade, engadiu Lagarde.