A Garda Civil intercepta un home que circulaba en patinete eléctrico pola autovía A-52

Unha patrulla do Destacamento de Tráfico da Garda Civil de Ourense interceptou un home que circulaba en patinete eléctrico pola autovía A-52 en dirección O Porriño (Pontevedra).

Tal e como trasladou a Garda Civil nunha nota de prensa, o pasado 11 de setembro, arredor das 16:00 horas, recibiron varios avisos a través do 112 alertando da presenza dun patinete eléctrico circulando pola autovía A-52.

Os axentes desprazáronse ata alí, localizando ao vehículo á altura do punto quilométrico 247, en sentido O Porriño. O seu condutor, un home de mediana idade, manifestou incorporarse por erro á autovía seis quilómetros antes e, ao decatarse da confusión, decidiu continuar circulando pola vía de alta capacidade.

Neste contexto, os propios axentes trasladaron ao condutor e o seu patinete fóra da autovía no vehículo oficial para evitar riscos propios e da seguridade viaria.

Por estes feitos formulouse unha denuncia por infracción grave ao Regulamento Xeral de Circulación, sancionada con 200 euros.

Con todo, a Garda Civil lembrou que se prohibe circular por travesías, vías interurbanas e autoestradas e autovías que transcorren dentro de poboado, con vehículos de mobilidade persoal. Así mesmo, queda prohibida a circulación destes vehículos en túneles urbanos.