"O xefe que introduciu 650 quilos de droga quería o control do porto de Vigo", di un axente encuberto

O xefe da organización criminal asentada en Málaga, que introduciu 650 quilos de cocaína polo porto de Vigo en abril de 2023 camuflada en bananas, estaba "obsesionado" con facerse co monopolio da importación de droga pola terminal viguesa e "non quería que ninguén lla pisase".

Así o manifestou o axente policial encuberto, con código Aciñeira, na súa declaración como testemuña no xuízo que se celebra por estes feitos na sección quinta da Audiencia Provincial de Pontevedra.

Esta testemuña logrou gañar a confianza do xefe da organización, simulando que tiña vínculo laboral coa actividade loxística e portuaria, e encargóuselle que, xunto a persoal da súa confianza, facilitase a descarga en Vigo do contedor coa droga (camuflada no medio de palés con bananas), e facilitase o "rescate" desa cocaína para a súa posterior carga e traslado nun camión.

Damián G. U., considerado polos investigadores como o xefe desta rede, está en paradoiro descoñecido. Neste xuízo séntanse no banco do acusados catro dos seus homes: os tres que se desprazaron desde Málaga para rescatar a droga no porto olívico e o condutor do camión que ía transportar a cocaína ata o seu destino.

A Fiscalía pide para cada un deles 12 anos de prisión e multa de 100 millóns de euros, por un delito de tráfico de drogas cometido por unha organización criminal.