Xulgan os principais acusados dunha rede que extraía cocaína nun laboratorio de Oia

Sete dos nove detidos na operacion Buchaga Gofre sentan no banco dos acusados da Audiencia de Pontevedra que os xulga dende o luns pola súa suposta implicación na trama de narcotráfico desartellada no 2021. Dos outros dous, un pactou coa fiscalía o primeiro día unha multa e unha condena de 3 anos de prisión. O outro non estará presente por alegar enfermidade. 

A instrución procede do xulgado número 1 de Cambados, e a investigación culminou coa detención dunha decena de persoas en Cambados, Sanxenxo, O Porriño, Vigo e Ferrol. Segundo a acusación, os procesados do sur de Galicia surtían de heroína un ferrolán residente nun poboado que a distribuía por esa localidade. 

Nos rexistros participaron unidades especializadas da Garda Civil e da Policía Nacional e incautáronse de 5 quilos de heroína. Na operación atopouse un laboratorio que a trama tiña agochado no baixo dunha casa en Oia, onde se extraía cocaína impregnada en cartón que cruzaba o Atlántico en colectores. 

A cocaína procedía de América do Sur e xestionábana a través dun grupo dominicano e a heroína mediante un contacto en Turquía Entre os procesados hai vellos coñecidos das causas por nacotráfico, entre eles un avogado vigués que estudou a carreira na prisión da Lama e ao que atoparon un quilo de heroína no rexistro do seu despacho. 

A fiscalía pide 11 anos de prisión para cinco deles por un delito contra a saúde pública e integración en organización criminal: nove anos para outro dos acusados e investígase a outros dous, con domicilio en Ferrol, por venda de drogas.