Once detidos e intervidos 6 quilos de cocaína nunha operación en Lugo e na Coruña

O Corpo Nacional de Policía deu por desarticulada unha das principais redes de distribución de estupefacientes que operaba na cidade de Lugo e na provincia da Coruña coa detención de once persoas nunha operación policial que permitiu a intervención de case seis quilos de cocaína.

Segundo a información facilitada este mércores, a operación policial foi desenvolvida por axentes do Grupo I de Policía Xudicial da Comisaría Provincial de Lugo, en colaboración co Grupo II da UDYCO Pontevedra e o Grupo de UDYCO da Coruña.

Levouse a cabo en catro fases, en outubro do ano 2025 e febreiro, maio e xuño de 2026. Durante o desenvolvemento da citada operación, once persoas foron detidas, das cales seis ingresaron en prisión.

En total, foron practicados cinco rexistros domiciliarios, nos cales os axentes da Policía Nacional interviñeron cinco quilos e oitocentos gramos de cocaína. A maior parte da droga incautada estaba repartida en “paquetes orixinais”, aínda sen abrir.

Por iso, a Policía lembra que esa cantidade veríase notablemente incrementada no mercado negro, “no caso de que fose mesturada ou cortada con outras substancias a fin de aumentar o beneficio” da organización.

Así mesmo, neses rexistros foron intervidas varias doses de haxix, 8.655,00 euros en efectivo, básculas de precisión, numerosos teléfonos móbiles e outros efectos supostamente empregados para a manipulación e a embalaxe da droga.

Con estas detencións, precisa a Comisaría Provincial de Lugo nun comunicado, dáse por finalizada a investigación e erradicados cinco puntos de venda de menudeo na capital lucense, tres deles na zona de sur e dous na zona centro, desde onde supostamente se vendía droga directamente aos consumidores.