O Atlético fixo pequeno o City pero faltoulle o gol
Empate sen goles no Metropolitano nun partido no que mereceron máis os de Simeone
Na batalla de estilos gañou Simeone sobre o céspede pero Guardiola pasou a eliminatoria. Moitos criticaron o estilo ultra defensivo do Atlético de Madrid no partido de ida. Ben é certo que deixou a todo un Manchester City nuns números ofensivos moi pobres.
O obxectivo era chegar con vida ao Metropolitano e alí xogarse as súas opcións. Puido sairlle ben porque o Atlético mereceu moito máis no partido de volta.
En primeiro lugar converteu ao Manchester City nun equipo vulgar, incapaz de xogar o fútbol de posesión do que presume. Case non apareceu pola área do Atlético nin inquedou a Oblak.
Unha vez conseguido o aspecto defensivo faltaba o ofensivo. Os de Simeone comezaron a arriscar na segunda metade metendo moito máis ritmo pero faltoulles a sorte do gol, e abofé que tiveron oportunidades. Empate a cero final e a eliminatoria decidiuna De Bruyne cunha gadoupada illada no partido de ida.
O Manchester City xogará diante do Real Madrid unha das semifinais. A outra será a que protagonicen o Vilarreal e o Liverpool. Duelo Premier-La Liga entre os dous mellores campionatos do mundo.
