O arquivo da Catedral de Santiago deixa ver esta semana documentos como o Códice Calixtino

Desde o claustro de catedral, atravesando portas velas, pasadizos e corredores, accédese ao arquivo da Catedral de Santiago. Nas súas salas atesoura documentos que forman parte do patrimonio documental máis importante da historia da humanidade, como o Códice Calixtino. 

Oculta no interior dun moble da Sala López Ferreiro, está a trapela que dá acceso ao arquivo musical. Garda segredos valiosos, porque Santiago foi na Idade Media unha referencia para compositores, nunha catedral que tiña a súa propia orquestra. 

Co atril móbil podemos ver que o tamaño destes libros de cantos tiña o seu sentido, porque a letra e os tons tiñan que ser vistos polos membros do coro a metros de distancia.

Curiosidades coma estas explícanse ás visitas guiadas que poden acceder ao arquivo unha vez ao ano

"Está aberto normalmente á investigación, pero non ás visitas, como pode estar o museo. Os documentos hai que custodialos e sofren coas visitas", dixo Francisco Buide, o arquiveiro da Catedral.

Pero son a historia de todos nós, e por iso no século XIX o papa tomou unha decisión: "Poñer á disposición da xente de xeito moderno, científico, histórico, crítico, os nosos documentos. E aquí en Santiago colle o testemuño López Ferreiro", explica o arquiveiro.

Nunha destas vitrinas, o códice famoso polas intrigas dun roubo moi mediático.

"Fíxose popularmente coñecido con eses acontecementos 'amarillistas', pero o seu valor supera amplamente todo uso. A propia Unesco recoñéceo como Patrimonio da Humanidade", declarou Francisco Buide, o arquiveiro da Catedral.

Pero tamén os pergamiños dos tombos, breviarios coma o de Miranda ou a copia da bula que outorga ao xubileu de Santiago máis antigüidade que ao de Roma. Documentos algúns deles onde podemos observar algunhas das primeiras palabras escritas en lingua galega.