A tempada de pesca fluvial irá do 15 de marzo ao 31 de xullo, con veda no salmón

A próxima tempada de pesca continental en Galicia arrincará o 15 de marzo de 2026 e desenvolverase ata o 31 de xullo con carácter xeral, pero estará vedada a captura de salmón en toda a comunidade debido aos baixos valores detectados nos ríos.

As datas foron acordadas este xoves na reunión do Consello Galego de Pesca Continental, durante a que se analizaron as propostas realizadas polos consellos provinciais de pesca.

Ademais do período hábil xeneral, determináronse unhas normas e determinacións para cada especie.

No caso da troita, poderase pescar do 15 de marzo ao 31 de xullo, coas excepcións das masas de auga salmoeiras, de reo e as de montaña, nas que a tempada comezará o 1 de maio.

Para o salmón, tendo en conta a información dos indicadores de abundancia recentes obtidos nos ríos galegos, que alcanzaron valores baixos, vedouse a súa pesca en todos os ríos galegos.

A directora xeral de Patrimonio Natural, Marisol Díaz, informou de que desde a Consellería de Medio Ambiente levará a cabo un seguimento da evolución das principais poboacións galegas desta especie con metodoloxías como os contadores automáticos xa existentes nos ríos Ulla, Eo e Landro.

Está prevista a colocación o próximo ano de, polo menos, dous novos contadores nas presas de Bora, no río Lérez, e A Freixa, no río Tea.

Polo que respecta ao reo, o período xeral de pesca estenderase do mesmo xeito que este ano do 1 de maio ao 31 de xullo, prolongándose ata o 30 de setembro nalgúns cotos.

Plan de manexo do corvo mariño grande

Na reunión do Consello Galego de Pesca Continental tamén se informou dos principais resultados do Plan de manexo das poboacións de corvo mariño grande en Galicia, tras constatar o "incidente" que esta especie está a ocasionar sobre as poboacións de peixes, especialmente no caso dos salmónidos.

O obxectivo é minimizar a súa presión depredadora sobre os peixes e garantir que as medidas que se adopten non incidan negativamente na conservación desta ave.

O plan de manexo desenvolveuse en oito cotos das catro provincias galegas e, tras os resultados conseguidos, aplicáronse as medidas para os distintos niveis de manexo establecidos no plan e avaliáronse os resultados das mesmas.