Falece José María Díaz, deán da Catedral de Santiago cando se produciu o roubo do Códice Calixtino

José María Díaz, sacerdote e historiador, recibirá sepultura este luns ás cinco da tarde no claustruo da catedral de Mondoñedo, a súa vila natal. Alí naceu en 1930, nunha casa moi próxima á de Cunqueiro.

O que fora deán da Catedral de Santiago cando se produciu o roubo do Códice Calixtino, José María Díaz Fernández, faleceu este domingo. Así o confirmou a diocese de Mondoñedo-Ferrol a través dun post no seu perfil da rede social X, onde adiantou o lugar e a hora do  funeral do relixioso.

Formado intelectualmente en Roma, era un sabio cun coñecemento que abarcaba os máis diversos ámbitos da cultura e dende logo era o maior experto sobre o significado do Pórtico da Glória.

Gran parte da súa vida estivo ligada á cidade de Santiago. José María Díaz chegou á capital de Galicia moito antes de ser cóengo da catedral. Primeiro chegou a Compostela para traballar no inmenso arquivo da catedral. O seu traballo á fronte da Catedral viuse desbordado no momento en que se produciu o roubo do Códice Calixtino por parte do antigo electricista do templo, home ao que el protexera. Era xullo de 2011.

Recuperado o Códice, en outubro de 2011, José María Díaz renunciou ao cargo de cóengo arquiveiro, que ocupaba desde había 36 anos. Retirouse a Mondoñedo, onde nacera e en cuxo seminario fixera os primeiros estudos eclesiásticos.