O ano de Stefan Zweig: a mostra 'Detrás do espello' explora o seu vencello con Galicia co seu diario

Por primeira vez en España, a Cidade da Cultura de Santiago vai exhibir o diario do intelectual austríaco Stefan Zweig, que agoira o ascenso do nazismo nos anos 30 do século pasado, xusto no ano en que as súas obras pasan a dominio público.

Será dentro da mostra Detrás do espello, que se inaugura o luns vindeiro e analiza a relación que tiveron con Galicia medio cento de figuras universais, como Zweig, Einstein ou Cortázar.

O seu diario narra a visita dun día a Vigo que realizou pouco despois do golpe de estado franquista e que logo incluiría na obra O mundo de onte.

Para Román Rodríguez, conselleiro de Cultura, a exposición quere demostrar a visión de Galicia que tiveron grandes intelectuais do século XX, como Zweig e o medio cento máis de científicos, artistas, cineastas ou escritores coas 300 pezas que compoñen a mostra.