O alugueiro de pisos encarece en Galicia, e Lugo é a capital onde máis subiron os prezos
O estudo do portal Fotocasa sinala que, malia este encarecemento, os lugueses só destinan un 26 % do soldo a pagar o alugueiro
Cada vez é máis complicado ver anuncios de alugueiros de pisos en Lugo. E se chamamos por teléfono, os prezos son ben diferentes dos de hai dous anos. A cidade da muralla é a capital galega en que máis se encareceu o alugueiro de vivendas.
Atopamos pisos mesmo de 1.200 euros, sen entrar xa en vivendas de luxo. Na rúa moitos non comprenden por que subiron tanto. Os lugueses consideran excesivo o peso que ten a vivenda no gasto fixo das familias.
O estudo do portal Fotocasa sinala que, malia este encarecemento, os lugueses só destinan un 26 por cento do soldo a pagar o alugueiro, moi por debaixo do máximo galego do 39 por cento que teñen que gastar os pontevedreses.
