En Vigo, os pisos turísticos deberán contar con entrada independente no edificio
Despois de Santiago e A Coruña, Vigo súmase ás grandes cidades galegas para regular os pisos turísticos
Delimitarán as zonas saturadas na cidade e unha cota máxima deste tipo de aloxamentos por edificio
A Asociación de Vivendas Turísticas de Galicia di que estas normas non baixan os prezos dos alugueiros tradicionais e temen que prexudiquen o turismo familiar, e hai descontento tamén entre os hostaleiros
O Instituto Nacional de Estatística dános unha idea da concentración de vivendas turísticas en Galicia. Son datos recollidos de plataformas de aloxamento: máis de 1.300 en Vigo, preto de 500 en Santiago e unhas 700 na Coruña. Os concellos buscan regular estes aloxamentos.
Vigo únese así agora a Santiago, que conta con normativa propia dende o 2024, e á Coruña, onde entrará nun par de meses. No caso de Vigo tamén aposta por acoutar o número deste tipos de vivendas por edificio e nas zonas máis saturadas.
A Asociación de Vivendas Turísticas de Galicia di que estas normas non baixan os prezos dos alugueiros tradicionais e teme que prexudiquen o turismo familiar.
Unha idea semellante comparten os hostaleiros, que apuntan que o perfil de cliente é distinto. No sector apuntan que moitos propietarios optan polo alugueiro turístico polo temor a faltas de pagamento no alugueiro tradicional. En Galicia apenas hai unha ducia de concellos sen ningunha vivenda turística.
