O millo chega a duplicar o seu tamaño habitual nestas datas
As condicións climáticas son boas, e isto axuda a que a planta medre a bo ritmo
En xeral, o crecemento é alto e homoxéneo e non houbo ataques de pragas
Leiras dunha gandería do municipio de Val do Dubra son un exemplo do crecemento do millo no que vai desta campaña. As condicións climáticas son boas, e isto axuda a que a planta medre a bo ritmo.
"Está grande, está moi ben con respecto á data na que estamos con respecto a outros anos. Tampouco sementamos moi cedo, a mediados de maio, e está cun crecemento alto, moi homoxéneo, non houbo ataques de pragas e está medrando ben. Ata agora non lle falta de nada!", conta Marcos Blanco, da gandería Queirugueira.
Teñen unhas 70 hectáreas de millo, e non en todas a planta medrou por igual, pero en xeral, a media de crecemento é alta.
"Agora pode ter a altura dunha persoa. Con respecto a como estaría nesta data noutros anos, pois ao mellor pouco máis da metade ou a metade".
Aínda queda moito tempo por diante ata o momento do ensilado e a futura evolución da campaña depende de certos factores.
"Que veña calor, que non sopre moito vento do nordés, que saca moito a humidade, e unhas chuvias".
Os gandeiros agardan que se dean estas circunstancias porque o millo constitúe unha parte moi importante do alimento dos seus animais.
