O aeroporto de Santiago entra en fase de calibracións para abrir o xoves 28 de maio

O aeroporto de Santiago-Rosalía de Castro entrou xa na fase de calibracións dos sistemas renovados coa previsión de abrir as súas instalacións ao tráfico aéreo o vindeiro xoves 28 de maio.

Aeroportos Nacionais e Navegación Aérea (Aena), a entidade pública que xestiona tanto os aeroportos como o control do tráfico aéreo en España, informou este venres de que tras o asfaltado, pintura e iluminación do campo de voos, están a levarse a cabo comprobacións de todos os sistemas para abrir o tráfico aéreo a semana próxima "con todas as garantías".

"As obras continuarán con outras actuacións, pero coa pista preparada para a operación das aeronaves", explican desde Aena.

Esta fin de semana realizaranse os voos de calibración necesarios para axustar o sistema de precisión ILS Cat. II/III que axuda a realizar as aterraxes en condicións de baixa visibilidade.

O aeroporto de Santiago-Rosalía de Castro permanece pechado desde o 23 de abril pasado para executar a fase máis complexa das actuacións correspondentes á rexeneración profunda do pavimento da pista, dentro do marco dos traballos de renovación que comezaron o pasado 13 de xaneiro, e que se levan a cabo na infraestrutura compostelá.

Esta obra, adxudicada por un importe de 26,6 millóns de euros, recolle tamén a renovación do balizamento e da drenaxe no campo de voos, a nivelación do terreo das áreas críticas e as franxas de seguridade a ambos os dous lados da pista, e a renovación dos sistemas ILS do aeroporto, entre outras actuacións.

As actuacións obrigaron a suspender a súa actividade aeronáutica durante un total de trinta e cinco días, entre o 23 de abril e o 27 de maio, evitando desta forma o peche durante a tempada alta de tráfico de pasaxeiros do aeroporto e actuando nun período de tempo con meteoroloxía máis favorable para o correcto desenvolvemento dos traballos.

Aena coordinou o peche da pista coas aeroliñas, que reorganizaron a súa grella de voos asignando parte das rutas establecidas en Santiago aos aeroportos da Coruña e Vigo.

O resto de empresas que desenvolven a súa actividade na infraestrutura, como os comercios, a restauración ou as compañías de alugueiro de vehículos adaptáronse ao peche reestruturando a súa actividade en función das súas necesidades, sinala Aena.