Catoira sofre un novo roubo de cable de cobre

Un novo roubo de cable en Catoira empeza a preocupar, e non pouco, o Concello e a veciñanza. En menos dun mes é a terceira vez que os cacos rouban cable e deixan sen iluminación pública as zonas próximas onde actúan. 

Este mércores operarios do Concello traballaban arreo para repoñer a iluminación pública do parque empresarial. Durante a fin de semana, e por terceira vez en menos dun mes, os cacos roubaron uns tres quilómetros de cable. 

Desta volta o roubo afectou ás empresas do parque e a unha ampla zona de casas. Medra a preocupación entre a veciñanza ante a posibilidade de que se repita en calquera parte.

Novamente desde o Concello piden á veciñanza que avisen ante calquera movemento sospeitoso e á Garda Civil máis vixilancia.

Agardan ter restablecida a iluminación nos próximos días. Á espera de facer un cálculo total do subtraído e da reparación, para este concello pequeno o novo roubo supón un gran custo económico, ao que lle teñen que sumar os 6.000 euros dos roubos anteriores.