Nove anos do asasinato de Diana Quer
A nai e o pai de Diana Quer compartiron emotivos recordos nas redes sociais
O Chicle cumpre a condena de prisión permanente revisable en León
"Hoxe chega outra vez ese día que me pesa na alma", escribe a nai de Diana Quer. O pai manda bicos ao ceo.
Fai nove anos da morte violenta da moza madrileña. O autor do crime, José Enrique Abuín Gey, o Chicle, está na prisión de Villahierro, en León. A lei permitiríalle solicitar saídas temporais dende finais deste ano, pero non parece posible.
En 2020 o Tribunal Supremo ratificoulle a pena de prisión permanente revisable polo asasinato, cometido para ocultar un delito previo contra a liberdade sexual, sumados a catro anos por detención ilegal e agresión sexual, coa atenuante de confesión.
Abuín dera antes moitas voltas na súa versión dos feitos que conduciron á morte da rapaza de 18 anos. Detivérano logo da denuncia doutra moza que dixo que a intentara meter no maleteiro do seu coche, en Boiro, no Nadal de 2017.
Por Noitevella, o Chicle confesou que ocultara o cadáver de Diana Quer nunha nave abandonada de Rianxo.
Pasaran 497 días de procura. Xornadas pragadas de hipóteses cos diferentes achados da investigación e entre as declaracións duns pais divorciados con outra filla en común, Valeria.
