Nova evacuación de menores palestinos para recibir atención médica en España

O Ministerio de Sanidade organizou unha nova operación para evacuar 19 nenas e nenos palestinos dende a franxa de Gaza para recibir atención médica en hospitais españois.

Segundo informa o departamento nunha nota de prensa, chegarán este luns de madrugada, xunto a 73 acompañantes, á base aérea de Torrejón de Ardoz, en Madrid.

Os pacientes foron trasladados ata a fronteira entre Israel e Xordania, onde as autoridades israelís os entregaron a un equipo do Ministerio de Sanidade encabezado pola ministra Mónica García, e coa participación de persoal médico mobilizado para a ocasión.

Coma as catro evacuacións anteriores, trátase dunha operación coordinada por Sanidade xunto á Organización Mundial da Saúde e o Centro de Coordinación de Resposta a Emerxencias da Comisión Europea.

Médicos Sen Fronteiras encargouse da supervisión médica durante o traslado ata Amán e tamén colaboran os ministerios de Defensa, Exteriores, Unión Europea e Cooperación; Inclusión, Seguridade Social e Migracións e Interior.

O Exército do Aire e o Espazo mobiliza dous avións e máis dunha ducia de militares da Unidades Médica de Aeroevacuación, entre os que se atopan médicos e enfermeiros de voo, intensivistas e técnicos sanitarios.

A ministra de Sanidade esta semana en Madrid. EFE/ Borja Sánchez-Trillo

Pacientes con diversas doenzas

Os menores son pacientes de traumatoloxía con feridas producida polos efectos dos ataques israelís, de oncoloxía e hematoloxía, con cardiopatías conxénitas, doenzas neurolóxicas, oftalmolóxicas ou nefrolóxicas.

Unha vez estean en España, serán distribuídos por hospitais de Castela-A Mancha, Asturias, Castela e León, Euskadi, Navarra, Murcia, Aragón e Cataluña.

O Instituto Nacional de Xestión Sanitaria, organismo adscrito ao Ministerio de Sanidade, xestionou a distribución e coordinación nos distintos centros sanitarios.

O Ministerio de Inclusión, Seguridade Social e Migracións, xunto á ONG Accem, encargarase da acollida e atención integral das familias, incluíndo aloxamento, manutención, atención psicolóxica, xurídica e servizos de tradución e interpretación.

A Oficina de Cooperación Española en Amán, dependente da Axencia Española de Cooperación Internacional para o Desenvolvemento (Aecid), realizou todos os trámites, mentres que a Embaixada de España en Xordania tramitou os visados.